ကျွန်တော်မုန်းသော လူအချို့ 

အဲဒီနေ့ က ကျွန်တော်ရယ် ၊ ကျွန်တော့်အဖေရယ် ၊ ကျွန်တော့် ညီမလေး ၂ ယောက်ရယ် မော်လမြိုင် ကနေ ရန်ကုန်ကို သွားဖို့  အိမ်ကနေ မနက်စောစော ထွက်ခဲ့ကြတယ် ။ အဲဒီအချိန် တုန်းက မော်လမြိုင် နဲ့  ရန်ကုန် က တိုက်ရိုက် ကားလမ်း မပေါက်သေးဘူး ။ မော်လမြိုင်ကနေ မုတ္တမကို ဇက်သဘောင်္နဲ့  ကူး ၊ မုတ္တမ ကနေမှ ကားနဲ့ ဖြစ်ဖြစ် ရထားနဲ့  ဖြစ်ဖြစ် ရန်ကုန်ကို သွားရတယ် ။

ကျွန်တော်တို့  သဘောင်္ဆိပ်ကိုရောက်တော့ မိုးစလင်းနေပြီး ။ ဇက်ပေါ်မှာတော့ ကုန်တွေ ၊ ခရီးသွားတွေ နဲ့  ပြည့်နေတယ် ။ ကျွန်တော်တို့ လဲ အဆင်ပြေတဲ့ နေရာမှာ အဆင်ပြေသလို ကြည့်ထိုင်ပြီး ဟိုငေး ဒီငေးနဲ့  လိုက်ခဲ့ ကြတယ် ။ မုတ္တမ ဆိပ်ကို သဘောင်္ ကပ်တော့ မိုးတော်တော်လင်းနေပြီး ။

သဘောင်္ကပ်ပြီးတော့ ကျွန်တော်ပထမဆုံး သတိထားမိ တာက လူတွေ ရုတ်ရုတ် သဲသဲနဲ့  သဘောင်္ပေါ်က ဆင်းရမှာ ကြောက် နေကြတယ် ။ ဒီနေ့  တော်တော် ထူးဆန်းတယ် ။ ဒီခရီးကို ကျွန်တော် အကြိမ်တွေ အများကြီး လာဖူးပါတယ် ။ ခရီးသည်တွေများ ခါတိုင်းဆို အနံ့ အသက်ပေါင်းစုံနဲ့  လူတွေ ကြပ်သိပ်နေတဲ့ ဒီသဘောင်္ပေါ်က ဆင်းချင်ကြလွန်းလို့  တစ်ချို့ ဆို သဘောင်္ မကပ်ခင်တောင် ဘောတံတား ပေါ်ကို ခုန်ကူးကြတယ် ။ လူတွေ ရုတ်ရုတ်သဲသဲ ဖြစ်နေတော့ ကျွန်တော့် အဖေက ဆိပ်ခံ တံတားပေါ်ကို လှမ်းကြည့်တယ် ပြီးတော့ ချက်ချင်းပဲ သား အဖေ့ နားမှာ ကပ်နေ လူချင်းမကွဲ စေနဲ့  အဖေတို့  အခုဆင်းမယ် လို့  လှမ်းပြောတယ် ။

ခါတိုင်းဆို ကျွန်တော်တို့  ကလေးတွေပါရင် လူနည်းနည်းရှင်းမှ သဘောင်္ပေါ်က ဆင်းတတ်တဲ့ ကျွန်တော့် အဖေက ဒီနေ့ တော့ ဆိပ်ခံတံတား ပေါ်တက်တဲ့ ထွက်ပေါက်နားမှာ တွန့် ဆုတ် တွန့် ဆုတ် နဲ့  ဆင်းရမလို မဆင်းရ မလို ဖြစ်နေတဲ့ လူအုပ်ကြီးထဲကို အတင်းတိုး နေတယ် ။ ဆိပ်ခံဘောပေါ် ရောက်တာနဲ့  ခါတိုင်းနဲ့  မတူ ထူးခြားနေတာက ဆိပ်ခံဘောနဲ့  တံတားပေါ်မှာ စစ်သားတွေ ၅ ပေ လောက်စီ ခြားပြီး တန်းစီ ရပ်နေကြတယ် ။

ခါတိုင်းဆို လူတွေ တံတားပေါ်မှာ တစ်ယောက်နဲ့  တစ်ယောက် သူ့ ထက်ငါဦးအောင် ဆူဆူညံညံ အပြေး အလွှား အလုအယက် တက်ဆင်း နေကြတာပါ ။ ခုတော့ တံတားဘေး ၂ ဖက်မှာ တန်းစီပြီး ရပ်နေတဲ့ စစ်သားတန်း ကြားထဲကနေ လူတွေက ဖြေးဖြေးချင်း တက်နေတော့ ၂ ယောက် တစ်တွဲ ၊ ၃ ယောက် တစ်တွဲ တန်းစီပြီး သွားနေကြသလို ဖြစ်နေတယ် ။ အားလုံးရဲ့  ခေါင်းတွေက ငိုက်လို့  စကားသံတွေ ကလဲ တိတ်ဆိတ်လို့  ။

ကျွန်တော့် အဖေ ကို ကျွန်တော် လှမ်းကြည့်လိုက်တော့ ပုခုံးတစ်ဖက်မှာ အဝတ်အစား အိတ်ကိုလွယ် ပြီး လက်တစ်ဖက်က ကျွန်တော့်  ညီမ အငယ်ကို ချီထားတယ် ။ အခြား လက်တစ်ဖက် ကတော့ လမ်းမှာစားဖို့  ထည့်လာတဲ့ ထမင်းချိုင့်တွေ ထည့်ထားတဲ့ ခြင်းကို ကိုင်ပြီး ကျွန်တော် ညီမ အကြီးကို လက်တွဲထားတယ် ။ အဝတ်အစား အိတ်တစ်လုံးနဲ့  ကျွန်တော်ကတော့ ကျွန်တော့်အဖေ နောက်နားမှာ ကန့် လန့်  ကန့် လန့်  ပေါ့ ။ ကျွန်တော့် အဖေလဲ အခြားသူတွေလိုပဲ ဘေးပတ်ဝန်းကျင်ကို မကြည့်ပဲ ခေါင်းငုတ်ပြီး တံတားကို တက်နေတယ် ။ ကျွန်တော့်ကိုတော့ ခဏခဏ လှည့်ကြည့်တယ် ။

ကျွန်တော်တို့  တံတားအလယ်လောက် ရောက်တော့ အောက်ဖက် ဆိပ်ခံဘော တံတားကနေ ဆူဆူညံညံ အသံတွေ ကြားရတယ် ။ သဘောင်္ရဲ့  အခြား တစ်ဖက်ကနေ ရေထဲ ခုန်ဆင်းပြီး ဆိပ်ခံဘော တံတားနဲ့  ဝေးတဲ့ဖက်ကို ရေကူးပြေး နေတဲ့ လူတစ်ယောက်ကို ပဲ့ချိတ်လှေ နဲ့  အသင့်စောင့် နေတဲ့ စစ်သားတွေက ပြန်လာခဲ့ဖို့  အော်ဟစ် ဆဲဆိုပြီး လိုက်ဖမ်းတာပါ ။ အဲဒီလူလဲ ကြာကြာ မကူးလိုက် ရပါဘူး ။ ပဲ့ချိတ်ပေါ်က စစ်သားတွေက မှီလဲသွားရော ပဲ့ချိတ်ပေါ်ကို အတင်းဆွဲ တင်နေတာ တွေ့ လိုက်တယ် ။ အဲဒီ အဖြစ်အပျက်ကို ရပ်ကြည့်နေတဲ့ ကျွန်တော့်ကို အဖေက ခပ်ဆတ်ဆတ်လေး ပုတ်ပြီး အနားမှာ နေပါဆိုတာ နားမထောင်ဘူး လာရှေ့ ကလျှောက် ဆိုပြီး မာန်ပါလေရော ။ အဲဒါနဲ့ ပဲ တံတားပေါ်ကို အရှေ့  ကနေ ဆက်တက်ခဲ့တယ် ။

တံတားထိပ်ရောက်တော့ လူတွေတန်းစီ သလို ဖြစ်နေရတဲ့ အကြောင်းကို ကျွန်တော် တွေ့ ရတယ် ။ စစ်သား ၃ ယောက်လောက်က တံတားထိပ်မှာ ပိတ်ရပ်နေပြီး တက်လာတဲ့ လူတွေအားလုံးကို အုပ်စု ၂ စုခွဲနေတယ် ။ တစ်ခြမ်းကို ဖယ်ထုတ်လိုက်တဲ့ သူတွေက ကိုယ့်ကိစ္စ ရှိရာကို ကိုယ်သွားနိုင်တယ် ။ ဒါပေမဲ့ အခြားတစ်ခြမ်းကို ဖယ်ထုတ်လိုက်တဲ့ သူတွေကတော့ စစ်သားတွေ ဝိုင်းပြီးစောင့်နေတဲ့ မီးရထားရုံး ရှေ့ က ကွင်းပြင်လေးမှာ သွားထိုင်ရတယ် ။

အုပ်စုခွဲနေတဲ့ စစ်သားက ကျွန်တော်တို့ ကို ကိုယ့်ကိစ္စရှိရာ သွားနိုင်တဲ့ လူစုဖက် ကိုပို့ ခဲ့တယ် ။ ရထားလက်မှတ် ကိစ္စတွေ ကျွန်တော့် အဖေ စီစဉ်နေတုန်းမှာ ကျွန်တော်ကတော့ ရထားရုံး ရှေ့ မှာ မျက်နှာ မသာမရာနဲ့  စုထိုင်နေရတဲ့ သူတွေကို စိတ်ဝင်စား နေမိတယ် ။ ဒီလူတွေကို ဘာလို့  ဆောင့်ကြောင့်လေး ဖမ်းထားသလို ထိုင်ခိုင်းထား ရတာလဲ ။ အဲဒီအချိန်တုန်းက စစ်တပ်နဲ့  အခြား လက်နက်ကိုင် တပ်တွေ ကလဲ တိုက်ပွဲတွေ ဖြစ်နေတဲ့ အချိန်ဆိုတော့ ဒီလူတွေက အခြားအဖွဲ့ က လူတွေမို့ လို့  ဖမ်းထားတာလား ကျွန်တော် သိချင်နေတယ် ။ အဲဒီ စုထိုင်နေရတဲ့ လူတွေနားကို ကျွန်တော် လျှောက်သွားပြီး ရပ်ကြည့် နေခဲ့တယ် ။

ကျွန်တော်ကြာကြာ မကြည့်လိုက်ရပါဘူး ။ ကျွန်တော့်အဖေ နောက်ကနေ တီးထည့်လိုက်လို့  ခေါင်းပူ သွားပြီး ဆွဲခေါ်တာကို ခံလိုက်ရတယ် ။ ကျွန်တော့်ကို ဘာမှ မပြောပဲ တိတ်တိတ်လေး ဆွဲခေါ်ခဲ့ပြီး ခပ်လှမ်းလှမ်း ရောက်တော့မှ ဘယ်လို ကလေးမှန်း မသိဘူး ၊ လူကြီးပြောတာ ဘယ်တော့မှ နားမထောင် ဘူးဆိုပြီး ဆူပါလေရော ။ ၁၅ မိနစ် လောက်အတွင်းမှာ ၂ ကြိမ် အဆူရော ၊ အဆော်ရော ခံလိုက်ရတော့ ကျွန်တော် နည်းနည်း ဘုသွားတယ် ။

ကျွန်တော်တို့  ရထားပေါ်မှာ ပစ္စည်းတွေ နေရာချပြီး ထိုင်နေလို့ မှ သိပ်မကြာ သေးဘူး စစ်သား ၂ ယောက် တွဲပေါ် တက်လာတယ် ။ ရထားပေါ်မှာ တစ်ခုခုကို ရှာနေတဲ့ ပုံစံနဲ့  လိုက်ကြည့်တယ် ။ ကျွန်တော်တို့ ကို ကျော်လျှောက် သွားပြီး အိမ်သာတွေကို သွားစစ်တယ် ။ အဲဒီစစ်သား ၂ ယောက်ကို လိုက် ကြည့်နေတဲ့ ကျွန်တော့်ကို အဖေက မျက်မှောင် ကြုံ့ုပြီး ငြိမ်ငြိမ် ထိုင်နေဖို့  လှမ်းပြောတယ် ။ ဒီတစ်ခါ ကတော့ ဘလိုင်းကြီး ကျွန်တော် ငြိမ်ငြိမ် ထိုင်နေရက်နဲ့  အဆူခံ ရတယ် ။ စစ်သား တစ်ယောက်က ကျွန်တော်တို့  နားကို ပြန်လျှောက် လာပြီး ကျွန်တော့် အဖေကို ကြည့်လိုက် ၊ ကျွန်တော်တို့  ကလေးတွေကို ကြည့်လိုက် လုပ်နေတယ် ။ ကျွန်တော့် အဖေက အဲဒီ စစ်သားနဲ့  မျက်လုံးချင်း ဆုံမှာကို ရှောင် ချင်ပုံ ရတယ် ပြတင်းပေါက် ကနေ အပြင်ဖက်ကို ကြည့်နေတယ် ။ ကျွန်တော် တို့ ကို ခဏရပ် ကြည့်ပြီး အဲဒီ စစ်သား ၂ ယောက် ပြန်ဆင်း သွားတယ် ။

အချိန်အတိုလေး အတွင်းမှာ ၃ ခါတောင် ဆူခံ ထိထားတော့ ကျွန်တော့် အဖေကို ကျွန်တော် ကောက်နေ လိုက်တယ် ။ ကျွန်တော့် အဖေကတော့ နာရီ တကြည့်ကြည့် လုပ်နေတယ် ။ ရထားကလဲ ထုံးစံ အတိုင်း အချိန် နောက်ကျ ပြီးမှ ထွက်တယ် ။ ရထားထွက်ပြီး ၁၅ မိနစ်လောက် ကြာပြီးတော့မှ သိသိသာသာ ကောက်နေတဲ့ ကျွန်တော့်ကို သားဗိုက်ဆာလား ဘာစားမလဲ ဆိုပြီး ကျွန်တော့် အဖေပြန်ချော့တယ် ။ အဲဒီနေ့ က အမြဲတမ်း လူပြည့်နေတတ်တဲ့ မုတ္တမ - မော်လမြိုင် ရထားက ထူးထူးခြားခြား တွဲတိုင်းမှာ ခုန်တွေ အများကြီး လွတ်နေခဲ့တယ် ။

ရန်ကုန်ဘူတာကြီးကို ရောက်တော့ ရန်ကုန်ကို ကြိုရောက်နေတဲ့ ကျွန်တော့် အမေက လာကြိုရင်း ဒီနေ့  ရထားက လူချောင်တယ်နော် လို့  ပြောတော့ မုတ္တမှာ ပေါ်တာဖမ်းနေလို့  ငါတောင် ကလေးတွေနဲ့  မို့ လို့ ထင်တယ် ကံကောင်းလို့  လွတ်ခဲ့တာ လို့  ကျွန်တော့်အဖေ ပြန်ပြောတော့မှ ကျွန်တော် မျက်လုံးပြူးရတယ် ။

ညဖက် မသကာင်္ဖွယ်ရာ မှောင်ရိပ်ခိုနေတဲ့ သူတွေ ၊ အကျဉ်းသား တွေကို စစ်တပ်က ပေါ်တာ အဖြစ် ခေါ်တတ်တယ် လို့ တော့ ကျွန်တော် ကြားဖူးတယ် ။ အခုလက်တွေ့  ကြုံရမှ ပေါ်တာ ဖမ်းတယ်ဆိုတာ ဒီလိုလဲရှိလား ဆိုပြီး အံ့သြမိတယ် ။ ရထားရုံးရှေ့ မှာ ထိုင်နေရတဲ့ လူတွေအားလုံးက ယောက်ျားလေး တွေချည်းပဲ ဆိုတာလဲ ခုမှ သတိထားမိတယ် ။ တံတားထိပ်မှာ ရပ်နေတဲ့ စစ်သားတွေက ယောက်ျားလေး တွေနဲ့  ကျန်တဲ့ သူတွေကို အုပ်စုခွဲ ထုတ်လိုက်တာပဲ ။ ရေကူးပြေးတဲ့ သူကို လိုက်ဖမ်းကြတဲ့ အဖြစ်အပျက် နဲ့  တံတားပေါ်က တစ်ခုခုကို ကြောက်နေတဲ့ ပုံစံနဲ့  ဖြေးဖြေးချင်း တန်းစီပြီး တက်နေတဲ့ လူအုပ်ကြီးကိုလဲ ပြန်မြင်မိတယ် ။ ကျွန်တော့်အဖေ ကျွန်တော့်ကို သူ့  အနားမှာ မနေလို့  ဆိုပြီး ခဏခဏ ဆူတာကို လဲ ခုမှ နားလည် မိတယ် ။

ကိုယ်တိုင်မကြုံဖူးရင် စစ်တပ်က ဒီလိုမျိုးတွေ လုပ်ပါ့မလားလို့  သံသရ ရှိနေမဲ့ သူတွေလဲရှိမယ် ။ သတင်းစာ ရှင်းလင်းပွဲ တိုင်းကို အရင်က ဒိုင်ခံပြီး ဖြေတတ်တဲ့ ပြည်တွင်းက အရာရှိ တစ်ယောက်က ဒီလို အတင်းအကျပ် ခိုင်းစေမှုတွေ အရင် ပြည်တွင်းမှာ တိုက်ပွဲတွေ ဖြစ်နေစဉ် ကာလ တုန်းကရှိ ခဲ့ပေမဲ့ ခုတော့ တိုင်းပြည်က အေးချမ်းနေပြီး ဖြစ်တဲ့ အတွက် အဲဒါမျိုးတွေ မရှိတော့ ဘူးလို့  သတင်းစာ ရှင်းလင်းပွဲ တစ်ခုမှာ ရှင်းပြပြီး ဝန်ခံခဲ့ဖူးတယ် ။ ဒါပေမဲ့ အဲဒီလို လုပ်တဲ့ သူတွေကို ဘယ်လို အပြစ်ပေးမယ် ဆိုတာမျိုး ၊ နောက်ထပ် ဒါမျိုးတွေ ထပ်မဖြစ်အောင် ဘယ်လို စီစဉ်ထားတယ် ဆိုတာမျိုး သူမပြောခဲ့ဘူး ။ အခုထိ ပြည်တွင်းမှာ တိုက်ပွဲတွေ ဖြစ်နေပြီး ဆိုတာနဲ့  ပေါ်တာတွေ ဖမ်းနေတယ် ဆိုတဲ့ သတင်းက အမြဲတမ်း ကပ်ပါလာ တတ်တယ် ။

ကျွန်တော် အလယ်တန်း ကျောင်းသား အရွယ်တုန်းက ကျွန်တော့် အစ်ကို အကြီးဆုံးက မြ၀တီ မဲဆောက် ဖက်က တဆင့် ထိုင်းနိုင်ငံ သွားပြီး ကုန်တွေ သွားသွား ၀ယ်ပါတယ် ။ အဲဒီ အချိန် တုန်းက ကရင် အဖွဲ့ တွေနဲ့  အစိုးရ တပ်တွေ တိုက်ပွဲ အကြီးအကျယ် ဖြစ်နေတဲ့ အချိန်ပါ ။ လမ်းခရီးမှာ ပေါ်တာ ခဏခဏ ဖမ်းပါတယ် ။ ကျွန်တော့် အစ်ကို ကို ဂရုစိုက်ဖို့  ပြောတော့ ပေါ်တာ ဖမ်းတာတော့ ရှောင်လို့  မရ ဘူးတဲ့ ၊ ကံပဲတဲ့ ။ ခေါ်ချင်ရင် တည်းနေတဲ့ နေရာ တံခါး လာခေါက်ပြီး ခေါ်တာတဲ့ ။ ဒါပေမဲ့ စိတ်မပူ ပါနဲ့  လူအစား ငှားလို့  ရတယ်တဲ့ ။ ကိုယ် အဖမ်းခံ ရရင် ကိုယ့်အစား လူတယောက် ငှားပြီး အစားထိုး ထည့်ပေး လိုက်လို့  ရတယ်တဲ့ ။ အဲဒီလို အငှားလိုက်တဲ့ သူတွေ ရှိတယ်တဲ့ ။ သူ့ အရပ် နဲ့  သူ့ ဇာတ်ကတော့ ဟုတ်နေတာပဲ ။

နိုင်ငံခြား သတင်း ဌာနတွေ နဲ့  ခဏခဏ အင်တာဗျူး လုပ်တတ်တဲ့ ပြည်ပရောက် အရာရှိ ဟောင်း တစ်ယောက်ကလဲ စစ်တပ်မှာ ပေါ်တာ ခေါ်ရင် ပေါ်တာ သမား တစ်ယောက် အတွက် တစ်ရက်ကို လုပ်အားခ ဘယ်လောက်ပေးရမယ် ၊ ဆန်ဘယ်လောက် ၊ ဆီဘယ်လောက် ပေးရမယ်ဆိုပြီး သတ်မှတ်ထားတာ ရှိတယ် ။ အဲဒီအတိုင်းသာ အမှန်အတိုင်း ပေးပြီး ခေါ်ရင် ကိုယ့်သဘော နဲ့ ကိုယ် လိုက်ကြမဲ့ သူတွေ အများကြီး ရှိပါတယ် ၊ အတင်းအကျပ် ခေါ်နေစရာ လိုမှာ မဟုတ်ပါဘူးလို့  အင်တာဗျူး တစ်ခုမှာ ပြောဖူးတယ် ။ အခြေအနေတွေ သိနေရက်နဲ့  ပြည်တွင်းမှာ တုန်းကတော့ မျက်စိပိတ် နားပိတ် နေခဲ့ပြီး ပြည်ပရောက်မှ အော်နေတာတော့ ဘာလို့ လဲ ဆိုတာ သူပဲ အသိဆုံး ဖြစ်မယ် ။

ကျွန်တော် စစ်တပ်ကို မမုန်းပါဘူး ။ စစ်တပ်ဆိုတာ နိုင်ငံ တစ်နိုင်ငံမှာ မရှိမဖြစ် အဖွဲ့ အစည်း တစ်ခုပါ ။ ကျွန်တော်တို့  နိုင်ငံရဲ့  သမိုင်းမှာလဲ စစ်တပ်က အရေးကြီးတဲ့ နေရာက အများကြီး ပါခဲ့ပါတယ် ။ ဒါပေမဲ့ ဥပဒေ ကို လက်တလုံးခြား လုပ်နေတဲ့ သူတွေ နဲ့  ကိုယ်မြင်ချင်တာကိုပဲ ရွေးပြီး မြင် တတ်ကြတဲ့ စစ်တပ်ထဲက လူတွေ ကိုတော့ ကျွန်တော် မုန်းတယ် ။

BBC သတင်းထောက်နဲ့  interview မှာ ဒေါ်အောင်ဆန်းစုကြည် ပြောခဲ့တဲ့ စကားပါ …
“ I don't want to see the military falling. I want to see the military rising to dignified heights of professionalism and true patriotism ”

ဓာတ်ပုံထဲက ဇာတ်လမ်းများ (၁)

Einsatzgruppen ဆိုတာ ဒုတိယ ကမ္ဘာစစ် မတိုင်မှီက ဖွဲ့ စည်းခဲ့တဲ့ ဂျာမန် အထူးလက်ရွေးစင် တပ်ဖွဲ့  တစ်ခုပါ ။ Einsatzgruppen တပ်သားတွေရဲ့  အဓိကတာဝန်က ဂျာမန်တပ်မကြီးတွေ နောက်ကလိုက်ပြီး ဂျာမန်တွေ သိမ်းပိုက်ပြီးတဲ့ မြို့  ရွာတွေက လူတွေကို ရက်ပိုင်းအတွင်း အစုလိုက် အပြုံလိုက် သတ်ဖို့  ဖြစ်တယ် ။

Einsatzgruppen တပ်သားတွေဟာ ၂ ရက်အတွင်း လူပေါင်း ၃၃၄၇၁ ယောက် အသတ်ခံခဲ့ ရတဲ့ Babi Yar massacre နဲ့  ၂ ရက်အတွင်း လူပေါင်း ၂၅၀၀၀ အသတ်ခံခဲ့ ရတဲ့ Rumbula massacre အပါအဝင် Poland, Netherlands, Belgium, France နဲ့  Soviet Union စတဲ့ နိုင်ငံတွေမှာ လူတွေကို အစုလိုက် အပြုံလိုက် သတ်ခဲ့ကြတယ် ။

ဒုတိယ ကမ္ဘာစစ် ကာလ အတွင်းမှာ Einsatzgruppen တပ်သားတွေဟာ စစ်သုံ့  ပန်းတွေ ၊ သူလျှိုတွေ ၊ အပြစ်မဲ့ ပြည်သူတွေ ၊ သက်ကြီး ရွယ်အိုတွေ နဲ့  ကလေးငယ်တွေ အပါအဝင် လူပေါင်း ၁ သန်းကျော်ကို ပစ်သတ်ခဲ့ကြတယ် ။ အသတ်ခံခဲ့ ရတဲ့ လူအများစု ကတော့ ဂျူး လူမျိုးတွေ ဖြစ်တယ် ။

















ဝမ်းနည်း ကြေကွဲစရာ ကောင်းတဲ့ မှတ်တမ်း ဓာတ်ပုံတွေထဲက အောက်က ဓာတ်ပုံကတော့ လူသိ အများဆုံးနဲ့  အကြော်ကြားဆုံး ဓာတ်ပုံပါ ။ အဲဒီဓာတ်ပုံကို Einsatzgruppen တပ်သား တစ်ယောက် သိမ်းထားတဲ့ ဓာတ်ပုံတွေထဲက ရခဲ့တာဖြစ်ပြီး ဓာတ်ပုံရဲ့  နောက်ကျောဖုံးမှာ “The last Jew of Vinnitsa” (Vinnitsa မြို့ မှ နောက်ဆုံး ဂျုး) လို့  ရေးထားတယ် ။ အဲဒီ အချိန်တုန်းက Vinnitsa မြို့ မှာ နေထိုင်နေတဲ့ ဂျုးလူမျိုး ၂၈၀၀၀ လုံး အသတ်ခံခဲ့ရတယ် ။

ငုတ်တုတ် ဗုဒ္ဓ

ကျွန်တော် ၁၀ တန်း နှစ်က တက်တဲ့ ရူပဗေဒ ကျူရှင်က ဆူးလေဘုရားနဲ့  တော်တော်လေး နီးတယ် ။ ကျူရှင်ရဲ့  ဘေးနားမှာလဲ ဗလီတစ်ခု ရှိတယ် ။ အချို့  စာသင်ချိန်တွေက ဗလီမှာ ဘုရား ဝတ်ပြုကြတဲ့ အချိန်နဲ့  တိုက်နေတယ် ။ ဗလီမှာ ဘုရား ဝတ်စပြု ကြပြီးဆို လော်စပီကာနဲ့  အသံ အကျယ်ကြီး အော်တတ်တဲ့ အတွက် အဲဒီအချိန်ဆို ဆရာ့  အသံကို ဘယ်သူမှ မကြားရတော့ စာသင်တာကို ခဏရပ်ပြီး အသံရပ်သွားတဲ့ အထိ စောင့်နေ ရတတ်တယ် ။

တစ်နေ့  အဲဒီလို လော်စပီကာနဲ့  အော်တာကို စောင့်ပြီး အသံရပ်သွားတော့ ဆရာက စာဆက် မသင်သေးပဲ ကျောင်းသားတွေဖက် လှည့်ပြီး မွတ်စလင် ဘာသာဝင် ကျောင်းသား တစ်ယောက်ကို မင်းတို့  ဝတ်ပြုရင် အမြဲတမ်း ဘာလို့  အကျယ်ကြီး အော်ရတာလဲ ၊ တိုးတိုး ဝတ်ပြုလို့  မရဘူးလားလို့  ဆရာ မေးဖူးတယ် ၊ အဲဒီ ကျောင်းသားက အဲဒါ ကျွန်တော်တို့  ဝတ်ပြုတာကို ဘုရားသိအောင် ဝတ်မပြုခင် ဘုရားကို ခေါ်တာလို့  ပြန်ဖြေတယ် လို့ ပြောတယ် ။ ဘုရား ပင့်တယ် ဆိုတာမျိုးကို ပြောချင်တာ ဖြစ်လိမ့်မယ် ၊ ဒါပေမဲ့ အဲဒီ ကျောင်းသားက ဆရာ့ကို အဲဒါ ဘုရားကို ခေါ်တာလို့  လွယ်လွယ်ပဲ ပြန်ဖြေခဲ့တယ် ။

ဟိုတစ်နေ့ ကလဲ ရှေ့ နားမှာ အမြဲတမ်း ထိုင်တတ်တဲ့ တရုတ်မလေး ၂ ယောက် ကျုရှင် မလာလို့  ဆရာမေးတော့ ကမ်းနားလမ်းက ဘုံကျောင်း တစ်ခုကို ဗေဒင် မေးဖို့  ဆိုလား ၊ စာချ ဖို့  ဆိုလား မသိဘူး လုပ်ဖို့  သွားလို့  မလာဖြစ်တာလို့  ပြန်ပြော တယ်တဲ့ ။ နင်တို့  စာချတာက ကျုရှင်ကို လာပြီးမှ သွားရင် မရဘူးလား ဆိုတော့ အဲဒီ သူတို့  သွားမေးတဲ့ မယ်တော်လား ကိုယ်တော်လား မသိဘူး အဲဒီ ပုဂ္ဂိုလ်က ညနေဆို မရှိဘူး ၊ မနက်ပိုင်း သွားမှ မေးတာ မှန်တယ်လို့  ပြန်ပြော တယ်တဲ့ ။

ဆရာက ဆက်ပြီး မွတ်စလင် ဘာသာဝင် တွေက ဘုရားဝတ်ပြု တော့မယ်ဆို ဝတ်မပြုခင် ဘုရားကို အရင် အော်ခေါ်ရတယ် ။ တရုတ် ဘာသာဝင်တွေ ကျတော့ ဘုံကျောင်းကို စောစော သွားရတယ် ။ နောက်ကျမှ သွားရင် မတွေ့ ရ တော့ဘူး ။ ငါတို့  ဗုဒ္ဓဘာသာ ဘုရားပဲ ကောင်းတယ် ငါတို့  ဘယ်အချိန်ပဲ ဘုရားပေါ် တက်သွားသွား ငုတ်တုတ် ထိုင်နေတယ်တဲ့ ။ ။

မီးကို ငြိမ်းတဲ့ မီး

ကျွန်တော့်အထက်က အစ်ကိုနဲ့  ကျွန်တော် ၂ နှစ်လောက်ကွာတယ် ။ အထက်အောက် ကလဲဖြစ် အရွယ်ကလဲ သိပ်မကွာတော့ ငယ်ငယ်က ကျွန်တော်တို့  ၂ ယောက် ရပ်ကွက်ထဲမှာ ဆော့တဲ့အခါအတူတူပဲ ဆော့ကြတယ် ။ သူ့  သူငယ်ချင်းလဲ ကျွန်တော့် သူငယ်ချင်း ၊ ကျွန်တော့် သူငယ်ချင်းလဲ သူ့  သူငယ်ချင်း ပါပဲ ။

တစ်နေ့ ရပ်ကွက်ထဲက အခြားကလေးတွေနဲ့  ကစားနေရင်း ကျွန်တော့် ရွယ်တူ ကောင်လေး တစ်ယောက်နဲ့  ကျွန်တော် ငြင်းကြပါလေရော ။ ပြသနာက ငြင်းရုံနဲ့  ပြီးမသွားပဲ တစ်ယောက်နဲ့  တစ်ယောက် မခံချင်အောင် ပြောကြရင်းကနေ မင်းသတ္တိ ရှိရင် မင်းနဲ့  ငါနဲ့  တစ်ယောက်ချင်း ချမယ် ဆိုပြီး ဟိုကောင်က ကျွန်တော်ကို စိန်ခေါ်ပါလေရော ။

အပြိုင် ငြင်းတုန်းကတော့ ငြင်းခဲ့ပေမဲ့ သူ အဲဒီလို စိန်ခေါ် လာလိမ့် မယ်လို့  ကျွန်တော် ထင်မထားခဲ့ဘူး ။ ကျွန်တော်တို့  ၂ယောက်ရဲ့  ပြသနာကြောင့် ကစားပွဲကို ရပ်ထားရတယ် ။ သူက စိန်ခေါ်လိုက်တော့ ကစားနေတဲ့ အခြားကလေးတွေ အားလုံးရဲ့  အကြည့်က ကျွန်တော့်ဆီ ရောက်လာတယ် ။ ကျွန်တော် ဘာပြန်ပြော မလဲဆိုတာကို သိချင်နေကြတယ် ။

အဲဒီအရွယ်အထိ ကျွန်တော် အခြားသူတွေနဲ့  ကိုယ်ထိလက်ရောက် ဖြစ်တဲ့အထိ တစ်ခါမှ ရန်မဖြစ် ဖူးသေးဘူး ။ ကျွန်တော့်ကို စိန်ခေါ်တဲ့ ကောင်ကတော့ ရပ်ကွက်ထဲက ရွယ်တူတွေထဲမှာ ပွဲတိုင်းကျော်လို ဖြစ်နေ တဲ့သူ ။ ကျွန်တော် သူ့  ကိုကြောက်လားဆိုတော့ မကြောက်ပါဘူး ။ ဒါပေမဲ့ ကိုယ်ထိ လက်ရောက် ဖြစ်တဲ့အထိ ရန် တစ်ခါမှ မဖြစ်ဖူးတော့ ကိုယ့်လက်ရည် ဘယ်လိုရှိမှန်း ကိုယ်လဲမသိဘူး ။ ကျွန်တော့်မှာ သူ့  ကို ချက်ချင်း ပြန်ပြောစရာ စကား မရှိဘူး ။

ကျွန်တော်ဘာမှ ပြန်မပြောပဲ နဲနဲကြာကြာ ငြိမ်နေတော့ သူကပို အတင့်ရဲ လာတယ် ။ မင်းကြောက်နေ တာလား ၊ မင်းအခြောက်လား ၊ မင်း သတ္တိ မရှိ ဘူးလားကွ ဆိုပြီး ဆက်တိုက် စိန်ခေါ်တော့တယ် ။ အတူတူ ကစားနေတဲ့ အချို့  ကလေးတွေက သူ့ ကို အေးအေးဆေးဆေး ဆက်ဆော့ဖို့  ဝိုင်းပြောကြပေမဲ့ သူကတော့ ကျွန်တော့်ကိုပဲ ဆက်စိန်ခေါ် နေတယ် ။ ကျန်တဲ့ ကလေးတွေ က ကျွန်တော့်ကို ဝိုင်းကြည့် နေကြတယ် ။ ကျွန်တော့် အဖြေကို ပိုပြီး စိတ်ဝင်စား နေကြတယ် ။ ကျွန်တော် သူ့ ကို တစ်ခုခုတော့ ပြန်ပြော ရတော့မယ် ။

ဒီအတိုင်း ငကြောက်ကြီး ပါကွာဆိုပြီး အရှက်ကွဲခံပြီး အလျှော့ပေးလိုက် မလား ၊ ဒါမှမဟုတ် ထချပြီး အဖြေ ရှာမလား ။ ကျွန်တော် စဉ်းစားရပြီး ။ ကျွန်တော် ဒီအတိုင်း ကတော့ အလျှော့ မပေးချင်ဘူး ၊ ထချရင်ရော ငါသူ့ ကို နိုင်ပါ့မလား ဆိုတဲ့ သံသယ ကလဲ စိတ်ထဲမှာ ရှိနေတယ် ။ ဒါပေမဲ့ ကျွန်တော်တစ်ခုခုကို ရွေး ရတော့မယ် ။ ကျွန်တော် ဆုံးဖြတ်ချက် ချလိုက်တယ်။

ဒါပေမဲ့ ကျွန်တော် ဘာမှလုပ်စရာ မလိုလိုက်ဘူး ။ ကျွန်တော့် နောက်ဖက်ကနေ သူ့ နာမည်ကို လှမ်းခေါ်သံ ကြားလိုက်တယ် ။ သူ့ နာမည်ကို ခေါ်လိုက်တာ ကျွန်တော့် အစ်ကို ဆိုတာ ကျွန်တော် လှည့်မကြည့်ပဲ သိလိုက်တယ် ။ ကျွန်တော့် အစ်ကိုက သူ့ ကို “ငါ့ညီက အေးအေးဆေးဆေး ပြောနေတာကို မင်းက စိန်ခေါ်နေရအောင် မင်းကလူမိုက်လား ၊ မင်းမိုက်ရင် ငါ့ နဲ့  ချမယ်လို့ ” ဆက်ပြောလိုက်တယ် ။ ကျွန်တော့် အစ်ကိုက သူ့ ထက် အသက်လဲ ကြီးတယ် ၊ လူကောင်လဲ ကြီးတယ် ။

သူကျွန်တော့် အစ်ကို ကိုကြည့်ပြီး မင်းနဲ့  ငါကရွယ်တူမှ မဟုတ်တာ ၊ မင်းနဲ့ တော့ မချဘူးလို့  ပြန်ပြောတယ် ။ ကျွန်တော့် အစ်ကိုက မင်းမိုက်တယ် ချချင်တယ် ဆိုရင် ငါနဲ့ ချ ၊ ငါနဲ့ မချဘူး ဆိုရင်တော့ အခြားသူတွေကိုလဲ စိန်လိုက်ခေါ် မနေနဲ့  အေးအေးဆေးဆေး ဆက်ကစားဆိုပြီး ရန်ပွဲကို အဆုံးသတ် လိုက်တယ် ။ အဲဒီနေ့ က ရန်စတဲ့သူကို ကျွန်တော့်အစ်ကိုက ရန်ပြန်စပြီး ရန်ပွဲကို အဆုံးသတ် ခဲ့တယ် ။

အဲဒီအဖြစ်အပျက်ကို ကျွန်တော့်အစ်ကို ကတော့ မှတ်မိချင်မှ မှတ်မိမယ် ။ ကျွန်တော်ကတော့ ကျွန်တော့်ရှေ့ က ရပ်ပေးခဲ့တဲ့ သူ့ ကို အမြဲတမ်း ကျေးဇူးတင်နေတယ် ။ မှတ်သားစရာလဲ ရလိုက်တယ် ။ တစ်ချို့  အခြေအနေ တွေမှာ ရန်ကိုငြိမ်းဖို့  အတွက် ရန်လိုတယ် ။ Fight fire with fire ဆိုသလိုပဲ အချို့ အရာတွေကို တားဆီးဖို့  ၊ ရပ်တန့် အောင် လုပ်ဖို့  အတွက်က တူညီတဲ့ နည်းလမ်းနဲ့  ပြန်ပြီး တုန့် ပြန်မှုကသာ အမှန်ကန်ဆုံး ရွေးစရာ နည်းလမ်း ဖြစ်တယ် ။ ။

Defeat is not the worst of failures. Not to have tried is the true failure.
George Edward Woodberry

The war that will end war.
H. G. Wells

အမှတ်တရ နောင်တ

သူနဲ့ ကျွန်တော် အသက် ၆နှစ်လောက် ကွာတယ် ။ ကျွန်တော်တို့  နှစ်ယောက် သူငယ်ချင်းတွေလိုတော့ မတွဲခဲ့ ကြပါဘူး ။ ဒါပေမဲ့ ကျွန်တော်တို့  နှစ်ယောက် ကြားမှာ အခြားလူတွေနဲ့  မတူတဲ့ နားလည်မှုတွေ ရှိခဲ့တယ် ။ ကျွန်တော် တို့  နှစ်ယောက်လုံးက စနေသားတွေ ။ ကိုယ်လုပ် ချင်တာဆို မကောင်းဘူး ဆိုတာသိနေလဲ ဘယ်သူ ဘယ်လောက် တားတား လုပ်လိုက်ရမှ ။ မိဘတွေ မျက်ရည်ကျအောင် သူအကြိမ်ကြိမ် လုပ်ခဲ့ပေမဲ့ သူ့ ကိုလူဆိုး တစ်ယောက်လို့  ကျွန်တော် မြင်လို့ မရဘူး ။ သူလုပ်ခဲ့တာတွေ မှားတယ်ဆိုတာ ကျွန်တော် သိပါတယ် ။ ဒါပေမဲ့ သူ့ ဖက်က ခံစားမှုတွေကိုလဲ ကျွန်တော် နားလည်ပေးလို့  ရတယ် ။ ကျွန်တော် လုပ်တာတွေ ကိုလဲ မှားတယ် မှန်တယ် လို့  ဘယ်တော့မှ သူ မပြောခဲ့ဘူး ။ အခုမင်းငယ် သေးလို့ ပါကြီးလာရင်မင်းရှက်တတ် လာလိမ့်မယ်လို့  တော့ ကျွန်တော့်ကို တစ်ခါ သူပြောဖူးတယ် ။

မိသားစုနဲ့  ဝေးရာကို အရင်ကလဲ သူထွက်သွား ဖူးပါတယ် ။ ဒါပေမဲ့ ဘယ်လောက်ပဲ ကြာကြာ အန္တရာယ် ကင်းကင်းနဲ့  သူပြန်ရောက်လာမယ် ဆိုတာ ကျွန်တော် အမြဲ သိနေတယ် ။ ဘယ်တုန်းကမှ သူ့ ကိုကျွန်တော် မမျှော်ခဲ့ဖူးဘူး ။ ဒါပေမဲ့ ဒီတစ်ခါတော့ ဘာကြောင့်မှန်း မသိဘူး သူပြန်ရောက် မလာတာ နည်းနည်း ကြာလာတော့ ထူးထူးခြားခြား ကျွန်တော် သူ့ ကို စိုးရိမ်မိ နေတယ် ။ သူအန္တရာယ် ကင်းပါစေလို့  ဆုတောင်းနေမိတယ် ။ သူ ပြန်လာမှာကို မျှော်နေမိတယ် ။ အဲဒီအချိန်မှာ သူလဲ အိမ်ကိုအရမ်း သတိရနေ ခဲ့တယ် ဆိုတာ နောက်ပိုင်းမှာ ကျွန်တော်သိခဲ့ ရတယ် ။

ညဖက် သူငယ်ချင်းတွေနဲ့  လက်ဖက်ရည်ဆိုင် ထွက်ထိုင်ရင်း လမ်းမှာ ဝင်ငှားလာတဲ့ လက်ထဲက မဂ္ဂဇင်း ကို ဟိုလှန်ဒီလှန် လုပ်နေရင်းနဲ့  နာမည်ကြီး ဗေဒင် ဆရာတစ်ယောက်ရဲ့  လစဉ် ဟောစာတမ်း စာမျက်နှာ ဆီ ရောက်သွားတယ် ။ ဒီလ ကျွန်တော့် မွေးလအတွက် ဟောစာတမ်းမှာ ရပ်ဝေးရောက်နေ သူ တစ်ယောက် ပြန်လာမယ်တဲ့ ။ ကျွန်တော် အဲဒါဖတ်မိပြီး ဘယ်လိုပျော်မှန်း မသိဘူး ။ ဒီလထဲမှာ သူပြန်ကို ပြန်လာမယ်လို့  ကျွန်တော် တစ်ကယ် ယုံကြည်ခဲ့ တယ် ။ နောက် ၂ ရက် အကြာ လက်ဖက်ရည်ဆိုင် သွားနေတုန်း သူငယ်ချင်း တစ်ယောက်က နောက်ကနေ ပြေးလိုက်လာတယ် ။ သူပြန်ရောက် နေတယ်တဲ့ မင်းကို တွေ့ ရင် လွှတ်လိုက်ဖို့  မှာလိုက်တယ် လို့  ပြောတယ် ။

အဲဒီနေ့ က သူ့ ရဲ့ ပုံစံကို ကျွန်တော် မှတ်မိနေသေးတယ် ။ မညီမညာ ရှည်နေတဲ့ ဆံပင်တွေက ချေးတွေနဲ့  မာတောင့်နေပြီး သူ့ ရဲ့  ခေါင်းပေါ်မှာ ဘော်လုံး တစ်လုံးလို ဖြစ်နေတယ် ။ သူ့ ရဲ့  မျက်လုံး ၂လုံးက ရှိသင့်တဲ့ နေရာထက် တော်တော်လေး အထဲကို ရောက်နေတယ် ။ အခုမှ ယူလဲထားပုံ ရတဲ့ အင်္ကျီနဲ့  လုံချည် ကတော့ အရင်ကထက် ၃ ပုံ ၁ ပုံ လောက်ပဲ ကျန်တော့တဲ့ သူ့  ခန္ဓာကိုယ်နဲ့  ချောင်နေတယ် ။ ဘာပဲ ပြောပြော သူ ပြန်ရောက်လာတဲ့ အတွက် ကျွန်တော် ပျော်တယ် ။

သူ့ နဲ့ ပြန်ပါလာတဲ့ တောကြမ်းစီး ဖိနပ်တစ်စုံရယ် ၊ အပေါက်အပြဲ တွေနဲ့  စစ်ရောင် ဘောင်းဘီ တစ်ထည်ရယ် ၊ ဟောင်းနွမ်း နေပြီး ဖြစ်တဲ့ အင်္ကျီ အချို့ ကို လွှင့်ပစ်ဖို့  သူ နှမြောနေတယ် ။ အမှတ်တရ တွေ မို့ တဲ့ ။ သူ တွေ့ ကြုံ ခဲ့ရတဲ့ အတွေ့  အကြုံ အချို့ ကို ကျွန်တော် သိခွင့်ရခဲ့ ပေမဲ့ အစအဆုံး အသေးစိတ် ကိုတော့ ကျွန်တော် မမေးခဲ့ဘူး ။ သူကလဲ ပြောပြချင် ပုံမရဘူး ။

မြန်မြန်ပြန် ကျန်းမာလာအောင် သူ ညနေပိုင်း လမ်းလျှောက်ချင်တယ် အဖော်လိုက် ပေးပါလားဆိုလို့  သူနဲ့  ကျွန်တော် ညနေအချို့  လမ်းအတူတူ လျှောက်ဖြစ်တယ် ။ မင်းတစ်ယောက်ပဲ ငါ့ကို အမြဲတမ်းနားလည် ပေးတယ် ငါနေပြန်ကောင်း လာရင် လိမ်လိမ်မာမာ နေမယ် ၊ ကြိုးစားမယ် ၊ မင်းနဲ့  အသက်ကြီး လာတဲ့ အထိ အတူတူ နေချင်တယ်လို့  သူပြောဖူးတယ် ။ အဲဒီညနေက ကျွန်တော် သူ့  ကို ပြန်ပြုံးပြ ခဲ့ရုံက လွဲပြီး ဘာမှပြန် မပြောခဲ့ဘူး ။

သူ့ ဘဝရဲ့  ဖြစ်စဉ်တွေ အတိုင်း သူကြိုတွေး ထားတာတွေ ဘာမှ ဖြစ်မလာဘူး ။ ဒီတစ်ခေါက် အိမ်ကို သူ အန္တရာယ် ကင်းကင်းနဲ့  ပြန်ရောက် လာပေမဲ့ သူ့ ရဲ့  ဆေးစစ်ချက် နဲ့  ဆရာဝန်ရဲ့  အနှေးနဲ့  အမြန်ပဲ ကွာမယ် ဆိုတဲ့ စကားအရ သူ့  အတွက် မနက်ဖြန်တွေ အများကြီး သူနဲ့ အတူ ပြန်ပါမလာခဲ့ဘူး ဆိုတာသိခဲ့ ရတယ် ။

စကားအစမရှိ အဆုံးမရှိနဲ့  မင်းမှာ ရည်းစားရှိလားလို့  သူ ကျွန်တော့်ကို မေးဖူးတယ် ။ ဘာဖြစ်လို့ လဲ လို့  ပြန်မေးတော့ ငါသေပြီးလို့  လူ ပြန် ဖြစ်မယ်ဆိုရင် မင်းရဲ့  သားသမီး အဖြစ်နဲ့  ငါပြန်လာ ချင်တယ် မင်းရဲ့  ရည်းစားကို ငါမြင်ဖူး ထားချင်တယ်တဲ့ ၊ မရှိဘူး ဆိုတော့ သူဘာမှ ဆက်မပြောတော့ဘူး ။ ကျွန်တော်လဲ သူ့  ကို ဘာမှ ထပ်မပြော ခဲ့ဘူး ။

ဒီမွေးနေ့ က ငါ့ရဲ့  နောက်ဆုံး မွေးနေ့ ပါ ၊ ငါ ဘုရားသွား ချင်တယ်ကွာ ဆိုလို့  သူနဲ့  ကျွန်တော် သူ့ မွေးနေ့  မှာ ရွှေတိဂုံ ဘုရားကို ရောက်ခဲ့တယ် ။ ဘုရားပေါ်က ပြန်ဆင်းခါနီးမှာ အမှတ်တရ ဓာတ်ပုံ ရိုက်ရအောင် ကွာတဲ့ ၊ နောက်တစ်ခါ ဆိုတာ ရှိမှာမဟုတ် တော့ဘူးတဲ့ ။ ကျွန်တော် ၂ခါ လောက်ငြင်း လိုက်တော့ သူထပ် မပြောတော့ဘူး ။ သူစိတ်မကောင်း ဖြစ်သွားတယ် ဆိုတာ ကျွန်တော်သိတယ် ဒါပေမဲ့ အဲဒီနေ့ က ဓါတ်ပုံ မရိုက်ဖြစ်ပဲ ပြန်ခဲ့ကြတယ် ။

ကျွန်တော်ဆေးရုံရောက် သွားတော့ သူ အိပ်ပျော်နေတယ် ။ ဆုံးသွားတာ ကြာပြီးဖြစ်တဲ့ သူ့ ရဲ့  သူငယ်ချင်းက လာခေါ်နေတယ် ဆိုပြီး မနက်က ပြောနေတယ်လို့  အမေ ပြောပြတယ် ။ သူနာပြု ဆရာမ တစ်ယောက်က အနားက ဖြတ်လျှောက် သွားရင်းနဲ့  သူ့ ရဲ့  အခြေအနေက မကောင်းဘူး မနက်ဖြန်ကို မကျော်ဘူးလို့  ပြောသွားတယ် ။

ကျွန်တော့်မှာ ရက်ပိုင်းအတွင်း ဖြေရမဲ့ စာမေးပွဲ ရှိနေတဲ့ အတွက် အိမ်ပြန် စာကြည့်ပြီး သူပြန်နိုးချိန် လောက်မှန်းပြီး ညနေမှ ပြန်လာဖို့  အဖေ ကျွန်တော့်ကို ပြောတယ် ။ ထပြန်ဖို့  လုပ်နေတုန်း သူလှုပ်လာလို့  ကျွန်တော် ရောက်နေ တယ်လို့  သူ့ နားကပ်ပြီး အမေပြော လိုက်တော့ သူ့ မျက်လုံး ချက်ချင်း ပွင့်လာတယ် ။ ကျွန်တော့်ကို ကြိုးစားပြီး သူ ပြုံးပြတယ် ။ နှုတ်ခမ်းလေး တွန့် ဖို့  အတွက်တောင် သူ အတော် ကြိုးစား နေရတယ် ။

သူ့ ဘေးမှာ ကျွန်တော် သွားရပ်တော့ အခြေအနေက မင်း မြင်တဲ့ အတိုင်းပဲကွာလို့  အားယူပြီး သူပြောတယ် ။ ပြောပြီးတော့ တော်တော်လေး မောသွားပုံရတယ် ။ ခဏနားပြီး မနက်က သူနာပြု ဆရာမက အခန်းထဲမှာ လူနာ အရေအတွက် လာရေတော့ သူ့ ကို ရေဖို့  ကျန်ခဲ့တယ် လို့  ပြုံးပြီး သူ ထပ်ပြောတယ် ။ သူ့  စကားသံက မသဲကွဲပဲ လေသံတွေ လုံးနေတယ် ။ အဖေက ကျွန်တော့် အနားကပ်လာပြီး သူ မနက်ထဲက ကယောင်ကတမ်းတွေ ပြောနေတယ်လို့  ကျွန်တော့်ကို ပြောတယ် ။ သူကြားသွား ပုံရတယ် ။ ဇဝေဇဝါ့ ဖြစ်သွားတဲ့ မျက်နှာနဲ့  ကျွန်တော့်ကို ကြည့်တယ် ။ သူတစ်ခုခု ပြောဖို့  ကြိုးစားတယ် ။ ဒါပေမဲ့ သူတော်တော် မောနေတယ် စကားပြောလို့  မရဖြစ် နေတယ် ။ အမေက သူ့ အနားကပ် သွားပြီး အရမ်းမော နေရင် စကားဆက် မပြောတော့ ဖို့ နဲ့  ဘုရားစာ ဆိုနေဖို့  သူ့  ကိုပြောတယ် ။ သူဘာမှ ထပ်မပြောတော့ပေမဲ့ ကျွန်တော် ဘာပြော မလဲလို့  စောင့်နေ တယ် ။ တော်တော်လေး ကြာတဲ့ထိ ကျွန်တော့် ဆီက ဘာစကားမှ ပြန်မရတော့ မျက်စိမှိတ်ပြီး သူ ပြန်မှိန်း နေလိုက်တယ် ။ ကျွန်တော်လဲ အိမ်ပြန်ခဲ့တယ် ။ အိမ်ရောက်ပြီး နာရီပိုင်း အတွင်းမှာ အဖေ ရောက်လာတယ် ။ သူ အခုပဲဆုံးသွား တယ်တဲ့ ။

ဆေးရုံမှာ ဗလုံးဗထွေးနဲ့  သူ ပြောတဲ့ စကားတွေ အပြင် ဇဝေဇဝါ ဖြစ်နေတဲ့ သူ့  အကြည့်ရဲ့  အဓိပ္ပာယ်ကိုလဲ ကျွန်တော် နားလည်ခဲ့တယ် ။ မင်းကငါ့ကို အမြဲတမ်း နားလည်ပေးတယ် အသက်ကြီးတဲ့အထိ မင်းနဲ့  အတူတူ နေချင်တယ် လို့  သူပြော ခဲ့တုန်းကလဲ ကျွန်တော် ဘာမှ ပြန်မပြောခဲ့ပေမဲ့ စိတ်ထဲမှာတော့ တော်တော် ပျော်ခဲ့တယ် ။ သံသရာမှာ သူ လူပြန်ဖြစ် ခဲ့မယ်ဆိုရင် သူ့  လိုပဲ ကျွန်တော်လဲ သူ နဲ့  ပြန်ဆုံချင်တယ် ။ သူ့ ရဲ့  နောက်ဆုံးမွေးနေ့  တုန်းက ဘုရားပေါ်မှာ ဓါတ်ပုံ မရိုက် ဖြစ်ခဲ့ပေမဲ့ အဲဒီနေ့ ကို ကျွန်တော် အသေးစိတ် မှတ်မိနေ သေးတယ် ။ အဲဒီအကြောင်းတွေ အားလုံးကို သူ သိချင်မှ သိသွားမယ် ။

သူ့ ကိုသတိ ရတဲ့အခါတိုင်း ငါ ကယောင်ကတမ်း တွေပြောနေတာ မဟုတ်ဘူးဆိုတာ သိရဲ့ လားလို့  ဇဝေဇဝါ ဖြစ်နေတဲ့ သူ့ ရဲ့  နောက်ဆုံး အကြည့်က ကျွန်တော့်ကို မျက်ရည် ဝဲစေတယ် ။ သေသောသူ ကြာရင်မေ့ ဆိုပေမဲ့ သူ့ ကိုတော့ ကျွန်တော်မေ့ မှာမဟုတ် ဘူးထင်တယ် ။ ငါသေရင် ငါ့ကို မမေ့လိုက် ပါနဲ့  ကွာလို့  သူ ကျွန်တော့်ကို ပြောခဲ့ဖူးတယ်…

If you love someone, you say it, right then, out loud. Otherwise, the moment just passes you by.
Julia Roberts

Do not save your loving speeches for your friends till they are dead; Do not write them on their tombstones, Speak them rather now instead.
Anna Cummins

မှားနေသော အမှန်များ

မော်လမြိုင်မြို့  က အထက်တန်းကျောင်း တစ်ခု မှာ ကျွန်တော် ၆ တန်း အထိ ပညာသင်ခဲ့တယ် ။ ကျွန်တော် ၄ တန်း နှစ်မှာ ကျတဲ့ အင်္ဂလိပ်စာ ဆရာမ က အရမ်း စည်းကမ်း ကြီးတယ် ။ စာသင်တဲ့ အခါ တာဝန် တစ်ခုကို လုပ်နေရသလို မဟုတ်ပဲ ကျောင်းသားတွေ အပေါ်မှာ တကယ် တတ် စေချင်တဲ့ စေတနာ နဲ့  သင်တယ် ။ ဆရာမက အတန်းထဲမှာ စာ ခဏခဏ မေးတတ် သလို အပြစ်ပေး တာလဲ ကြမ်းတယ် ။ စာမေးလို့  စာမရခဲ့ရင် ယောက်ျားလေးပဲ ဖြစ်ဖြစ် ၊ မိန်းကလေးပဲ ဖြစ်ဖြစ် အတန်းရှေ့  ကိုထွက်ရပ် ခိုင်းပြီး ခြေတလုံး ၊ လက်ဝါး ၊ တင်ပါး စတဲ့ နေရာတွေကို ကြိမ်လုံး နဲ့  ရိုက်ပြီး အပြစ်ပေး တတ်တယ် ။

အပြစ်ပေးတာ ကြမ်းပေမဲ့ ဆရာမက စာမမေးခင်တော့ ကျောင်းသားတွေကို စာကြည့်ဖို့  အချိန် လုံလုံ လောက်လောက် ပေးပါတယ် ။ ဘယ်နေ့ မှာ ဘယ်စာကို မေးမယ် ၊ မရတဲ့သူ ကို ဘယ်လို အပြစ်ပေးမယ်လို့  အမြဲတမ်း ကြိုပြောတတ်တယ် ။ တစ်ခါတစ်လေ မေးခွန်း ဘယ်နှစ်ခုမေးမယ် ဘယ်နှစ်ခုနဲ့  အထက် မှားတဲ့ သူကို အတန်းရှေ့ မှာ ဘောင်းဘီချွတ်ပြီး ရိုက်မယ် ဆိုတာမျိုးလဲ ပြောတတ်တယ် ။ ဆရာမက ပြောတဲ့အတိုင်းလဲ တကယ်လုပ်တတ် တာကြောင့် အဲဒီလိုများ ပြောထားတဲ့ နေ့ ဆို အဲဒီ ဆရာမ အချိန်လွန်တဲ့ အထိ ကျောင်းသားအားလုံး လိုလိုက အချိန်အားရတိုင်း ဆရာမ မေးမယ် ဆိုတဲ့စာကို အခါခါ ပြန်ကြည့် နေတတ်တယ် ။

တစ်နေ့ မှာ ဆရာမက အင်္ဂလိပ်စာ အမေးအဖြေ မေးခွန်း အချို့  ကို ဒါတွေက စာမေးပွဲ အတွက် အရေးကြီးတယ် စနေ ၊ တနင်္ဂနွေ ကျောင်းပိတ်ပြီးလို့  နောက်တစ်ပတ် ကျောင်းပြန် ဖွင့်ရင် မေးမယ် ။ သေချာကြည့်လာ ခဲ့ကြ ။ အမှတ် အနည်းဆုံး ရတဲ့သူကို ဘောင်းဘီချွတ်ပြီး ရိုက်ရုံတင် မဟုတ်ပဲ အတန်းတစ်ပတ်လဲ ပတ်ခိုင်းမယ်လို့  ပြောတယ် ။ ကျောင်းသားတွေကို စာမေးပွဲ အတွက် တစ်ကယ့် အရေးကြီးတဲ့ စာကို သေချာ ကျက်စေ ချင်လို့  ဖြစ်မှာပါ အဲဒီလို အပြစ်ပေး နည်းမျိုး အရင်က တစ်ခါမှ ဆရာမ မပေးဖူးပါဘူး ။ ဒါ ပထမ ဆုံး အကြိမ်ပါ ။ အမှတ် အနည်းဆုံး ကျောင်းသားက လုပ်ရမှာ ဆိုတော့ တစ်တန်းလုံး အားလုံး မှန်အောင် ဖြေနိုင်ရင်ဖြေ ၊ မဖြေနိုင်ရင်တော့ တစ်ခုမှား ဖြေမိတဲ့ သူလဲ အပြစ်ပေးခံ ရမဲ့သူ ဖြစ်နိုင်တယ် ။ ဆရာမက ပြောတဲ့ အတိုင်း တစ်ကယ် လုပ်မှာကို သိနေကြတော့ အတန်းရှေ့  မှာ ဘောင်းဘီ ချွတ်ပြီး အရိုက်ခံ ရမှာကိုတောင် အားလပ်ချိန်မှာ ကစားဖို့  မေ့အောင် ကြောက်တတ်ကြတဲ့ ကျောင်းသားတွေ အတွက် ဘယ်လိုနေမလဲ ဆိုတာတွေး ကြည့်ပေါ့ ။

ကျွန်တော့်အတန်းထဲမှာ ဆရာမ အပြစ်ပေးတိုင်း အမြဲတမ်း လိုလို အပြစ်ပေးခံရတဲ့ ကျောင်းသား တစ်ယောက်ရှိတယ် ။ ဆရာမက စာကြည့်ဖို့  အချိန် ဘယ်နှစ်ရက်ပဲ ပေးပေး စာကြည့် ဖို့  သူမေ့လာ တတ်တယ် ။ သူ့ ရဲ့  အဖြေစာရွက်မှာ အမြဲတမ်းလိုလို ကွက်လပ်တွေ နဲ့  အဖြေမှားတွေ ပဲပါနေ တတ်တယ် ။ ဆရာမက အပြစ်ပေးဖို့  နာမည်ခေါ်လိုက် တိုင်း သူ့ နာမည်က မပါ မဖြစ်လို ဖြစ်နေတယ် ။ သူ အတန်းရှေ့  မှာရပ်ပြီး ဘောင်းဘီချွတ် အရိုက်ခံရတဲ့ အဖြစ်မျိုးကလဲ အတန်းထဲက ကျောင်းသားတိုင်း အတွက် ရိုးနေပြီး ။ ဆရာမက စာမေးမယ်လို့  ကြိုပြောထားတိုင်း အဲဒီအချိန် ရောက်ရင် သူ အပြစ်ပေး ခံရ တော့မယ်ဆိုတာ ကျောင်းသားအားလုံး အလွတ်ရ နေတဲ့ ပုံသေနည်း တစ်ခုလိုပဲ သိပ်မထူး ဆန်းတော့ဘူး ။

သူ့ ကို အတန်းထဲမှာ စာအညံ့ဆုံး ကျောင်းသား အဖြစ် အားလုံးက သတ်မှတ်ထား ကြပေမဲ့ ၊ သူဟာ ခပ်ဆိုးဆိုး ၊ ဂျစ်ကန်ကန် ကျောင်းသား တစ်ယောက် မဟုတ်ဘူး ။ စာသင်နေတဲ့ ဆရာမ တွေကိုရော ၊ အခြား ကျောင်းသား တွေကိုရော ဘယ်တော့မှ အနှောက်အယှက် မပေးတတ်ဘူး ။ သူအပြစ် ပေးခံရရင်လဲ အတန်းရှေ့  ကို ထွက်ရပ်တယ် ၊ အပြစ်ပေးခံ ရပြီးရင် ခေါင်းငုံ့ ပြီး သူ့  နေရာ သူ အေးဆေး ပြန်လာ ထိုင်တယ် ။ သူ အပြစ်ပေးခံ ရတာကို ကြည့်ပြီး ရယ်နေကြတဲ့ ကျောင်းသား တွေကိုလဲ ဘယ်တုန်းကမှ ဘာမှ သူ ပြန်မပြော တတ်ဘူး ။ စာသင်ခန်း ထဲမှာရော ၊ စာသင်ခန်း အပြင်မှာပါ သူ့  ဘာသာသူ အေးအေးပဲ နေတတ်တယ် ။

ဆရာမက သူ့ ကို လှည့်ကြည့်ပြီး ဒီ အမေး အဖြေ မေးခွန်း တွေက စာမေးပွဲ အတွက် တစ်ကယ် အရေးကြီးတယ် ။ ဒီတစ်ခါတော့ သေချာ စာကြည့်လာခဲ့ ၊ ဆရာမ ဘယ်သူ့ ကိုမှ ဘောင်းဘီချွတ်ပြီး အတန်းတစ်ပတ် မပတ်ခိုင်း ချင်ဘူး ။ စာမကြည့် လာရင်တော့ တစ်ကယ် လုပ်ရလိမ့်မယ်လို့  ပြောတော့ သူ့  မျက်နှာ ဘာမှ ပြောင်းလဲ မသွားဘူး ။ ဆရာမ ပြောတာကို ကြောက်သွားတဲ့ အမူအရာ မရှိ သလို ၊ လေးလေးနက်နက် ဖြစ်သွားတဲ့ အမူအရာလဲ မရှိဘူး ။ ပုံမှန် အတိုင်းပဲ “ဟုတ်ကဲ့” လို့  ဆရာမကို အသံ အေးအေးလေးနဲ့  ခပ်တိုတိုပဲ သူပြန်ဖြေတယ် ။

ကျွန်တော်တို့  စာသင်ခန်းရဲ့  ပုံစံက စားပွဲပုလေး တွေကို နံရံနဲ့  ကပ်မထားပဲ အတန်းအလယ်မှာ လူသွားလမ်း ချန်ပြီး စီထားတာပါ ။ အတန်းရဲ့  ထောင့်တစ်ခုမှာ အတန်းထဲက လူအရေအတွက်နဲ့  အကွက်လေးတွေ ဆွဲထားတဲ့ ဖိနပ်ချွတ်ဖို့  နေရာရှိပါတယ် ။ အတန်းထဲ ဝင်တာနဲ့  အတန်းရဲ့  ထောင့်မှာ ဖိနပ်တွေကို ချွတ်ထားခဲ့ ရပြီး ကျောင်းသားတွေ က ကြမ်းပေါ်မှာထိုင် ရတာပါ ။ အတန်းဘေး ပတ်ပတ်လည်မှာ လူသွားလမ်း နေရာရှိ ပါတယ် ။

အဲဒီ စနေ ၊ တနင်္ဂနွေ နှစ်ရက်လုံး ကျွန်တော်အဆော့လွန်ပြီး စာမကျက်ဖြစ်ဘူး ။ ဒီအမေးအဖြေ လေးတွေကို အလွတ်ကျက် လိုက်ရင် ခဏလေးနဲ့  ရပါတယ် ဆိုပြီး တွေးခဲ့ တာလဲပါတယ် ။ ကျောင်းသွား ရမဲ့ မနက်ရောက်မှ ဆရာမ မေးမယ်ဆိုတဲ့ စာကို ကြည့်ဖြစ်တယ် ။ ကျွန်တော်ထင်ထားသလိုအလွယ်လေးနဲ့  အလွတ်ကျက် လို့ ရတဲ့ မေးခွန်း မျိုးတွေ မဟုတ်ပဲ grammar တွေ နားလည်မှ ဖြေနိုင်မှာ ဖြစ်သလို ၊ V1, V2, V3 တွေကို အလွတ်ရဖို့  လဲ လိုအပ် နေတယ် ။ မေးခွန်း အားလုံး နားလည် အောင် နဲ့  Verb အမျိုးအစား အားလုံးကို အလွတ်ရအောင် ကျက်ဖို့  အချိန်ကလဲ မရှိတော့ဘူး ။ ဒီနေ့  ဆရာမ စာမေးရင်တော့ မေးခွန်း အားလုံးကို မှန်အောင် ဖြေနိုင်မှာ မဟုတ်ဘူး ဆိုတာ သိပေမဲ့ ၊ အမြဲတမ်း စာကျက်မလာ တတ်တဲ့သူ ဒီတစ်ခါလဲ စာကျက် လာမှာမဟုတ် ပါဘူးလေ ၊ သူက ငါ့ထက်တော့ ဆိုးမှာပါ ဆိုတဲ့ စိတ်နဲ့  ကျောင်းကို လာခဲ့တယ် ။

ကျောင်းရောက်တော့ သူ့ ကိုတွေ့ တာနဲ့  ဘယ်လိုလဲ ဒီနေ့  မေးမဲ့ စာတွေ ကြည့်ဖြစ် ခဲ့လား ဆိုတော့ ကြည့် ခဲ့တယ်လို့  ပြုံးပြီး သူပြန်ဖြေတယ် ။ ခါတိုင်း သူပြန်ဖြေ နေကြ အတိုင်း ကြည့်ဖို့  မေ့ခဲ့တယ်တို့  ၊ သေချာ မကြည့်ဖြစ် ခဲ့ဘူးတို့  လိုမျိုး အဖြေတွေကို ကျွန်တော် မျှော်လင့် ခဲ့တာ ၊ ခုတော့ ကျွန်တော့်ခေါင်း မိုးကြိုးပစ် ခံရပြီး ။ ငါ့လို အဆော့မက်ပြီး စာ သေချာ မကြည့်ခဲ့တဲ့ သူများ ရှိမလားလို့  လိုက်မေးကြည့် တော့လဲ ကျွန်တော် လိုချင်တဲ့ အဖြေ မရခဲ့ဘူး ။ အဲဒီနေ့ မှာ အချိန်အားရတိုင်း ကျောင်းသား အားလုံးက ကျက်မှတ်ခဲ့ ပြီးသား စာကို ပြန်နွှေးနေ ကြတဲ့ အချိန်မှာ ကျွန်တော် ကတော့ နားမလည်သေးတဲ့ စာတွေကို ချွေးတပျံပျံ နဲ့  နားလည်အောင် ကြိုးစားရင်း ဆရာမ ဒီနေ့  ကျောင်းမလာ ပါစေနဲ့  လို့  စိတ်ထဲက အကြိမ်ကြိမ် ဆုတောင်းနေမိတယ် ။ အဲဒီနေ့  က ကျွန်တော် ဆုတောင်း မပြည့်ခဲ့ သလို အဲဒီ ဆရာမ အချိန်ရောက်တဲ့ အထိ မေးခွန်းအားလုံး မှန်အောင် ဖြေနိုင်တဲ့ အထိ စာတွေကို ကျွန်တော် မကြည့်နိုင် ခဲ့ဘူး ။ ဒီနေ့  တော့ ကျွန်တော် ကံဆိုးပြီး ။

ကျောက်သင်ပုန်းပေါ်က မေးခွန်း တွေကို ဖြေနေရင်းနဲ့  သူ့ ကို ကျွန်တော် လှမ်းကြည့်ဖြစ်တယ် ။ ဒီနေ့ မှာ မေးမဲ့ စာကို သူသေချာ ကျက်ခဲ့ပုံ ရတယ် ။ ခါတိုင်းဆို သူများတွေ ဖြေနေချိန်မှာ ဒီအတိုင်း သူထိုင်နေတတ် ပေမဲ့ ဒီတစ်ခါတော့ မေးခွန်းတွေကို ဂရုစိုက်ပြီး သေချာ သူဖြေနေတယ် ။ ဖြေထားတဲ့ စာရွက်ကို ဆရာမဆီ သွားမပေးခင် အချိန်ထိ အကြိမ်ကြိမ် သူပြန် စစ်နေတာကို ကျွန်တော် တွေ့ တယ် ။ စာရွက် ပေးပြီး ပြန်လှည့်လာတဲ့ သူ့ ကိုဖြေနိုင်လားလို့  ကျွန်တော်မေးတော့ သူခေါင်းညိတ် ပြတယ် ။ သူ့  မျက်နှာမှာလဲ ယုံကြည်မှု အပြည့်နဲ့  ။

အရင် အခါတွေ တုန်းက ဆရာမ အပြစ်ပေးတာကို ခံရတဲ့ သူတွေထဲမှာ ကျွန်တော် ပါခဲ ပါတယ် ။ အဖြေ တစ်ခုမှား နှစ်ခုမှား တွေ အတွက် အရိုက်ခံခဲ့ ရဖူးပေမဲ့ ၊ ဘောင်းဘီ ချွတ်ပြီး အရိုက်ခံ ရတဲ့အထိ အခြေအနေ တခါမှ မဆိုး ခဲ့ဖူးဘူး ။ ခုတော့ ဘောင်းဘီ ချွတ်ပြီး အတန်း တစ်ပတ်ပါ ပတ်ရမယ် ဆိုတော့ ကျွန်တော် ငိုချင်နေပြီး ။ ဆရာမက တစ်ယောက်ချင်း နာမည်ကို ခေါ်ပြီး အဖြေလွှာတွေ ပြန်ပေးချိန်မှာတော့ ဘယ်နှစ်ခု မှားလဲ ၊ အမှတ်ဘယ် လောက်ရလဲ ဆိုတဲ့ ကျောင်းသား တစ်ယောက်နဲ့  တစ်ယောက် အပြန်အလှန် မေးတဲ့ အသံတွေနဲ့  တစ်ခန်းလုံး ရုပ်ရုပ်သဲသဲ ဖြစ်နေတယ် ။ ကျွန်တော့် အဖြေလွှာ ရတော့ ကျွန်တော် ၆ ခု မှားတယ် ။ ကျွန်တော့်ထက် ပိုမှားတဲ့ သူများရှိမလားလို့  အဖြေလွှာ ရပြီးသား သူတွေထဲမှာ လိုက်ရှာပေမဲ့ တစ်ခုမှား ၊ နှစ်ခုမှား ထက်ပို မရှိဘူး ။ ကိုယ်က အမှား အများဆုံး ဖြစ်နေတော့ ကိုယ့် အဖြေလွှာ ကို သူများကိုလဲ မပြရဲဘူး ။ အတန်းထဲမှာ ဟိုဖက်ထိပ်က လူနဲ့  စကားသွား ပြောလိုက် ၊ ဒီဖက်က လူနဲ့  စကားလာပြော လိုက်နဲ့  သူများမေး မခံ ရအောင် ပတ်ပြေးရင်း ကိုယ့်ထက် ပိုမှားတဲ့ သူကို ရှာနေ မိတယ် ။

ကိုယ့်ရဲ့  ရမှတ် သူများမေး မခံရအောင် ပတ်ရှောင် နေရင်းနဲ့  သူ့ ကို ကျွန်တော် လှမ်းကြည့် ဖြစ်တယ် ။ သူ့  အဖြေလွှာ ကို သူပြန် မရသေးဘူး ။ အရင်တုန်း ကဆို သူများတွေ အမှတ် ဘယ်လောက် ရသလဲ ဆိုတာ သူ စိတ်မဝင်စား သလို ၊ သူ ရဲ့  အဖြေလွှာ ကိုလဲ စိတ်ဝင်တစား သူ စောင့်မနေ တတ်ဘူး ။ ဒီနေ့  တော့ အခြားသူတွေ ရဲ့  ရမှတ်တွေကို သူစိတ်ဝင်စား ပုံမရ ပေမဲ့ သူ့ ရဲ့  အဖြေလွှာ ပေါ်က ရမှတ်ကိုတော့ သူတော်တော် သိချင်နေပုံ ရတယ် ။ ဆရာမ ဆီကနေ အကြည့်မလွှဲပဲ သူ့  နာမည် ခေါ်မဲ့ အလှည့်ကို သူ စိတ်ဝင်တစားနဲ့  ထိုင်စောင့်နေတယ် ။

ဆရာမလက်ထဲမှာ သူ့ အဖြေလွှာ တစ်ခုပဲကျန် တော့တယ် ။ ခုချိန်ထိ အတန်းထဲမှာ အမှား အများဆုံးဟာ ကျွန်တော် ဆိုတာ ကျွန်တော် တစ်ယောက်ထဲ သိသေးတယ် ။ သူ့ နာမည် လှမ်းခေါ်တော့ ဆရာမ ဆီ မပြေးယုံ တမယ် သူရောက်သွားတယ် ။ ကျောင်းသားအားလုံး ကိုယ့်အဖြေလွှာ ကိုယ်ပြန်ရပြီးသား ဆိုတော့ အကြည့် အားလုံး က သူနဲ့  ဆရာမဆီ ရောက်နေတယ် ။ သူ့ အဖြေလွှာ လှမ်းပေးရင်းနဲ့  ဆရာမက သူ့  ကိုပြောတယ် မင်းဖြေ ထားတာ အားလုံးမှားတယ်တဲ့ ။ အတန်းထဲက ကျောင်းသားတွေ သူ့ ကို ဝိုင်းရယ် ကြတယ် ။ အမှား ဖြေထားမိတဲ့ သူတွေ သက်ပြင်း ချကြတယ် ။ သူကတော့ ခေါင်းငုံ့ ပြီး သူ့ နေရာကို ပြန်လျှောက် လာရင်းနဲ့  ဆရာမ ပြောတာကို မယုံသလို သူ့ အဖြေလွှာကို တစ်ရွက်ချင်း တအံ့တသြ ပြန်လှန် ကြည့်နေတယ် ။

ဆရာမပေးမဲ့ အပြစ်က လွတ်သွားတဲ့ အတွက် ကျွန်တော် တော်တော် ပျော်သွားတယ် ။ တစ်ချိန်လုံး ငိုမဲ့မဲ့ ဖြစ်နေမဲ့ ကျွန်တော့် မျက်နှာလဲ ခုမှပဲ ပြန်ပြုံး နိုင်တယ် ။ ဒါပေမဲ့ သူ့ ရဲ့  ရမှတ်ကို သူ့ လိုပဲ ကျွန်တော်လဲ အံ့သြတယ် ။ အားလုံး မှားတယ် ? တစ်ကယ်ပဲလား ? ဘယ်လို ဖြစ်တာလဲ ? မနက်က ကျွန်တော် မေးတော့ သူစာ ကြည့်ခဲ့တယ် လို့ ပြောတယ် ။ သူ ပြောတာကို ကျွန်တော်ယုံတယ် ။ သူလိမ်ပြောစရာ အကြောင်းလဲမရှိ ဘူးလေ ။ မေးခွန်းတွေကို သူ သေချာ ဂရုစိုက်ပြီး ဖြေနေတာကိုလဲ ကျွန်တော် တွေ့ တယ် ။ ဖြေနိုင်လားလို့  ကျွန်တော်မေး တုန်းကလဲ ယုံကြည်မှု အပြည့်နဲ့  သူ ခေါင်းညိတ် ပြခဲ့တယ် ။ သူတစ်ကယ်ပဲ တစ်ခုမှ မှန်အောင် မဖြေနိုင်ခဲ့ ဘူးလား ? သူ့ အနားကို သွားပြီး သူ့  အဖြေလွှာကို ကျွန်တော် တောင်းကြည့် မိတယ် ။ ကျွန်တော် ဘာပြော ရမှန်း မသိ ဖြစ်သွား ခဲ့ရတယ် ။ သူ့ ရဲ့  အဖြေလွှာမှာ စာလုံးပေါင်း တွေရော ၊ grammar တွေရော သူဖြေထားတဲ့ အဖြေတွေရော အားလုံးကမှန် နေတယ် ။ ဒါပေမဲ့ သူ ရမှတ် သုံညပဲ ရခဲ့တယ် ။

အဲဒီနေ့  က မေးခွန်းတိုင်းမှာ ပါတဲ့ နာမည်တွေကို ဆရာမက Maung Maung ၊ Ko Ko စတဲ့ ၂လုံး ဆင့် နာမည်တွေ နဲ့  သုံးခဲ့တယ် ။ သူပြန် ဖြေတော့ အဖြေတွေမှာ နာမည်တွေကို Maung2 ၊ Ko2 ဆိုပြီး ပြန်ရေးခဲ့တယ် ။ သူ့  အဖြေတွေ အားလုံးမှန် နေပေမဲ့ ဆရာမက သူ့  အဖြေနေရာက နာမည် အားလုံးကို မှင်နီနဲ့  ဝိုင်းပြီး သူ့ ရဲ့  အဖြေ အားလုံးကို အမှားပေးခဲ့တယ် ။ အဲဒီနေ့  က အတန်းထဲမှာ အဖြေအားလုံး မှန်အောင် ဖြေနိုင်တဲ့ သူ နည်းနည်း လေးထဲမှာ အံ့သြ စရာ ကောင်းလောက်အောင် စာအညံ့ဆုံး ဆိုတဲ့သူ ပါခဲ့ ပေမဲ့  သူ ရမှတ် သုံည ပဲရခဲ့တယ် ။ အဲဒီနေ့ က စာလုံးပေါင်း တွေရော ၊ grammar တွေရော အများဆုံး မှားဖြေခဲ့ တဲ့ သူဟာ ကျွန်တော် ဖြစ်ပေမဲ့ အပြစ်ပေး ခံရတဲ့ သူဟာ သူဖြစ် ခဲ့တယ် ။

ခါတိုင်းအပြစ်ပေးခံရရင် အတန်းရှေ့ ကို ထွက်ရပ် ၊ ပေးတဲ့ အပြစ်ကို ခံပြီး ဘာမှ မထူးသလို သူ့  နေရာ သူပြန်လာထိုင် တတ်ပေမဲ့ ဒီနေ့  အပြစ်ပေးခံ ရချိန်မှာတော့ သူမျက်ရည် ဝဲနေခဲ့တယ် ။ ဆရာမ ကလဲ စိတ်မကောင်းဖြစ် သွားပုံရတယ် ။ အတန်းကို တစ်ပတ် ပတ်ပြီး သူ့ နေရာသူ ပြန်လာထိုင်တော့ ဆရာမ သူ့  အနားကို လျှောက်လာပြီး အင်္ဂလိပ်စာမှာ နာမည်တွေကို စာလုံးတူ နေရင်လဲ နှစ်လုံးကို ပေါင်းပြီး ရေးလို့  မရ ကြောင်း ၊ နောက်တစ်ခါ သတိထားပြီး ရေးဖို့  ရှင်းပြခဲ့တယ် ။ သူ ဆရာမကို မော့ မကြည့် ခဲ့ဘူး ။ ဘာမှလဲ ပြန်မဖြေ ခဲ့ဘူး ။ သူ့ ရှေ့  က စာပွဲကိုသာ ခေါင်းငုံ့ ပြီး စိုက်ကြည့် နေတယ် ။ ကျွန်တော် မမြင်ရပေမဲ့ သူ့ မျက်လုံးမှာ မျက်ရည်တွေ ဝဲနေဦးမယ် ဆိုတာ သေချာတယ် ။

အဲဒီနေ့ က တစ်ကယ် စာမကျက်ခဲ့ တဲ့ ကျွန်တော်ကသာ အပြစ်ပေးခံ ရမဲ့သူ ဖြစ်သင့်ပေမဲ့ သူ ကံဆိုး ခဲ့တယ် ။ ကျွန်တော် သူ့ အတွက် တစ်ကယ် စိတ်မကောင်း ဖြစ်ခဲ့ပါတယ် ။ ကိုယ်တိုင်လဲ ကိုယ်သာ အပြစ်ပေးခံ ထိသင့်တဲ့သူ ဆိုတာကို သူ အပါအဝင် ဘယ်သူ့  ကိုမှ မပြောပဲ လျှို့ ဝှက်ထား ခဲ့တဲ့အတွက် ကလိမ်ကကျစ် ကျခဲ့သူ တစ်ယောက်လို လိပ်ပြာ မလုံဖြစ်ခဲ့ ရတယ် ။

ခါတိုင်းနဲ့  မတူ ဒီနေ့ မှာမှ သူဘာလို့  ကြိုးစားပြီး စာတွေ ကြည့်ခဲ့တာလဲ ? ဒီတစ်ခါ ဆရာမ ပေးမယ်ဆိုတဲ့ အရင် အခါတွေထက် ပိုပြင်းတဲ့ အပြစ်ဒဏ်ကို ခံရမှာ သူ တစ်ကယ် ကြောက်လို့  ကြိုးစားခဲ့ တာလား ? အတန်းထဲမှာ စာ အညံ့ဆုံး ကျောင်းသားလို့  သတ်မှတ်ခံ ထားရတာကို ပြောင်းပစ်ချင်လို့  သူကြိုးစားခဲ့ တာလား ? သူ့ ရဲ့  အရည်အချင်း အမှန်ကို တစ်စုံ တစ်ယောက် ဒါမှမဟုတ် အတန်းသား အားလုံးကို ပြချင်လို့  သူကြိုးစားခဲ့ တာလား ? စိတ်အသစ် ၊ အတွေးအခေါ် အသစ် တွေနဲ့  အနာဂတ် အသစ်စဖို့  ခြေလှမ်းအသစ် အနေနဲ့  သူကြိုးစားခဲ့ တာလား ? ကျွန်တော် သေချာမသိဘူး ။ ကျွန်တော် သေချာ သိတာကတော့ အဲဒီနေ့  အတွက် သူကြိုးစား ခဲ့သမျှ အားလုံး အလကား ဖြစ်ခဲ့ ရတယ် ။

သူ့ ရဲ့  ပေါ့ဆမှုကြောင့် သူ သုံည မှတ်ပဲ ရခဲ့ ပေမဲ့ အဲဒီနေ့ မှာ သူဟာ ခပ်ညံ့ညံ့ ကျောင်းသား တစ်ယောက် မဟုတ်ဘူး ဆိုတာ သက်သေပြ ခဲ့တယ် ။ စိတ်မကောင်း စရာ ကောင်းတာက အဲဒီနေ့  နောက်ပိုင်းမှာ အရင်လိုပဲ သူပြန်ဖြစ် သွားတယ် ။ စာမေးမယ် ဆိုတဲ့ အခါတိုင်း စာ ကြည့်ဖို့  အမြဲတမ်း သူ မေ့လာ တတ်တယ် ။ အဖြေလွှာတွေ ပြန်ဝေ နေချိန်တိုင်း ဘာစိတ်လှုပ်ရှားမှုမှ မပြပဲ သူနေရာမှာ သူခေါင်းငုံ့  ထိုင်ပြီး ဆရာမ ပေမဲ့ အပြစ်ကို ခံဖို့  စောင့်နေ တတ်တယ် ။

ဆယ်စုနှစ်တွေ ကြာခဲ့ပြီး ဖြစ်ပေမဲ့ သူ့  အကြောင်းကို ပြန်စဉ်းစားတိုင်း အဲဒီနေ့  က အဖြစ်အပျက်မှာ တစ်ခုခုလိုအပ် နေသလို ကျွန်တော် ခံစားရတယ် ။ တစ်ယောက်ယောက်မှာ အပြစ်ရှိ နေသလို ခံစားရတယ် ။ ဘယ်နေရာမှာ ဘာတွေလိုအပ် ခဲ့တာလဲ ? ဘယ်သူတွေ ဘယ်နေရာမှာ မှားခဲ့ကြတာလဲ ?

အဲဒီနေ့ က ဆရာမ မှားခဲ့ သလား ? ကျောင်းသားတွေကို စာကြည့်ဖို့  အချိန်လုံလုံ လောက်လောက် ဆရာမ ပေးခဲ့တယ် ။ ပေးမဲ့ အပြစ်ဒဏ် ကိုလဲ ကြိုပြောခဲ့တယ် ။ ပြောထား တဲ့အတိုင်း အမှတ် အနည်းဆုံး ရတဲ့ သူကို အပြစ်ပေးခဲ့တယ် ။ ဆရာမ လုပ်ခဲ့တဲ့ ထဲမှာ မှားတယ်လို့  ပြောလို့ ရတာ တစ်ခုမှ မပါဘူး ။

ကျွန်တော်ရော မှားခဲ့ သလား ? ကျွန်တော် ဘယ်နှစ်မှတ် ရလဲဆိုတာ အခြား ကျောင်းသားတွေကို မပြောပြခဲ့ ပေမဲ့ ဘယ်ကျောင်းသားက ဘယ်မေးခွန်းကို ဘယ်လို ဖြေခဲ့တယ် ၊ ဘယ်သူက ဘယ်မေးခွန်းမှာ ဘယ်လိုမှားတယ် ဆိုတာ ဆရာမ သိနေတာပဲ ။ ဆရာမ ကိုယ်တိုင် အပြစ်ပေး သင့်တဲ့ သူကို ရွေးပြီး အပြစ်ပေးခဲ့တာလေ ။ ကျွန်တော် လုပ်ခဲ့ တဲ့ထဲမှာ မှားတယ် လို့  ပြောလို့ ရတာ ဘာမှ မရှိဘူး ။

အဲဒီနေ့ က သူ တစ်ကယ် ကြိုးစားပြီး စာကြည့်ခဲ့တယ် ဆိုပေမဲ့ သူအပြစ်ပေး ခံခဲ့ရတာ သူ့ ရဲ့  ပေါ့ဆစွာ ဖြေဆိုခဲ့မှု ကြောင့်သာ ဖြစ်တယ် ။ သူ့  အပြစ်နဲ့  သူခံရတာပဲ ။ ဘယ်နေရာမှာမှ ဘာမှ မမှားခဲ့ဘူး ။ ဘယ်သူကမှ မှားတယ်လို့  ပြောလို့  ရတဲ့ လုပ်ရပ်မျိုး မလုပ်ခဲ့ဘူး ။ ဒါပေမဲ့ ဆယ်စုနှစ်တွေ ကြာအောင် တစ်ခုခု မှားနေခဲ့ တယ်လို့  ကျွန်တော် ဘာလို့  စွဲလမ်း နေရတာလဲ...

သူ အပြစ်ပေး ခံခဲ့ရပေမဲ့ ခါတိုင်းနေ့  တွေနဲ့  မတူတဲ့ သူ့ ရဲ့  ကြိုးစား အားထုတ် ခဲ့မှုကို အဲဒီနေ့ က ဆရာမ (သို့ မဟုတ်) တစ်ယောက်ယောက် ကသာ အသိအမှတ်ပြု ချီးမွမ်း ခဲ့ရင်...

ဒါမှမဟုတ်...

အဲဒီနေ့  မှာ တကယ်တော့ အညံ့ဆုံး ကျောင်းသားဟာ ကျွန်တော်သာ ဖြစ်ပြီး သူကတော့ ကံဆိုးခဲ့ သူသာ ဖြစ်တယ်လို့  ကျွန်တော် သူ့ ကို ရှင်းပြပြီး အားပေး ဖြစ်ခဲ့ရင်...

သူ အရင်လို ပြန်မဖြစ်ပဲ တစ်ခုခု ပြောင်းလဲခဲ့မှာလား... ကျွန်တော်ကရော ဘယ်သူမှ မှားတယ်လို့  ပြောလို့  ရတဲ့ လုပ်ရပ်မျိုး မလုပ်ခဲ့ ကြတဲ့ အဲဒီနေ့  က အဖြစ်အပျက်မှာ ၊ အပြစ်ရှိ သူတစ်ယောက်လို ဒီနေ့ ထိ ခံစားမိ နေဦး မှာလား...

V sign

ဓါတ်ပုံအရိုက်ခံတဲ့အခါတွေမှာ လက်ညှိုးနဲ့  လက်ခလယ် နှစ်ချောင်း ထောင်ပြီး V sign ပုံလေးနဲ့  အိုက်တင် ထုတ်ဖူးကြလား ? Asia ကလူတွေ အလုပ်များကြတယ် ။ အထူးသဖြစ် ဂျပန်ကလူတွေ ဓါတ်ပုံ အရိုက်ခံရင် V sign လုပ်ပြတာ ပုံသေနည်း တစ်ခုလို ဖြစ်နေပြီး ။ V sign ကို အဓိပ္ပာယ် တမျိုးထဲအတွက် မကအသုံး ပြုတတ်ကြပြီး လက်ဖဝါးကို အပြင်ဖက် ထားတာနဲ့  အတွင်းဖက် ထားတာ ကလဲ အဓိပ္ပာယ် ကွဲလွဲတယ် ။


လက်ဖဝါးကိုအပြင်ဖက်မှာ ထားပြီးပြတဲ့ V sign ရဲ့  အဓိပ္ပာယ်က victory နဲ့  peace ဖြစ်ပြီး ၊ လက်ဖဝါးကို အတွင်းဖက်မှာ ထားပြီးပြတဲ့ V sign ရဲ့  အဓိပ္ပာယ်က “ Up yours” ပါ ။ “Up yours” ဆိုတာ တစ်ယောက်ယောက်က ကိုယ့်ကို F word နဲ့  ဆဲရင် ပြန်ချေပတဲ့ စကားပါ ။ အဓိပ္ပာယ်က F word စကားနဲ့  အတူတူပါပဲ ။ဒါကြောင့် လက်ဖဝါး အတွင်းဖက်မှာ ထားပြီးပြတဲ့ V sign ဟာ the middle finger sign လို့  သိကြတဲ့ လက်ခလယ် ထောင်ပြတဲ့ sign နဲ့  အတူတူပါပဲ ။ ရိုင်းတဲ့ sign တစ်ခုပါ ။ လူတော်တော် များများက အဲဒီလို အဓိပ္ပာယ် ကွဲတာကို သတိမထားမိကြပဲ မှားယွင်းပြီး အသုံးပြုနေ ကြတာကို တွေ့  နေရတယ် ။


V sign ကို victory ၊ freedom ၊ peace စတဲ့ အဓိပ္ပာယ်တွေ အတွက် အသုံးပြုတဲ့ အခါမှာ လက်ဖဝါးကို အပြင်ဖက်မှာ ထားပြီးပြ ကြတယ် ။ လက်ဖဝါး အပြင်ဖက်မှာ ထားတဲ့ V sign ကို ဒုတိယ ကမ္ဘာစစ် ကာလက စပြီး အသုံးပြုခဲ့ကြတာ ဖြစ်တယ် ။ ဒုတိယ ကမ္ဘာစစ် ကာလမှာ မဟာမိတ် နိုင်ငံတော်တော် များများရဲ့  ခေါင်းဆောင်တွေဟာ မိန့်  ခွန်းပြောတဲ့ အခါတွေ ၊ သတင်းဌာန နဲ့  interview လုပ်တဲ့ အခါတွေမှာ V for victory ဆိုတဲ့ အဓိပ္ပာယ် နဲ့  လက်နှစ်ချောင်းကို V ပုံစံ လုပ်ပြီး V sign လုပ်ပြတတ် ကြတယ် ။

Winston Churchill ဟာ အစောပိုင်းမှာ V sign ကို လက်ဖဝါး အတွင်းဖက်ထားပြီး အသုံးပြု ခဲ့တယ် ။ တစ်ခါတစ်လေ ဆေးပြင်းလိပ်ကို လက်ကြားညှပ်ပြီး တော့လဲ လုပ်ပြတတ်တယ် ။ နောက်ပိုင်းမှာ လက်ဖဝါးကို အတွင်းဖက် ထားတဲ့ sign ဟာ အခြား အဓိပ္ပာယ်ကိုလဲ သက်ရောက်စေတဲ့ အတွက် လက်ဖဝါးကို အပြင်ဖက်ထားပြီး ပြောင်းသုံးခဲ့တယ် ။


Vietnam စစ်ပွဲ ကာလကစပြီး စစ်ပွဲ တွေကို မလိုလားတဲ့ သူတွေ ၊ ငြိမ်းချမ်းရေး အတွက် ဆန္ဒပြ လှုပ်ရှားသူတွေဟာ စစ်ပွဲတွေကို ဆန့် ကျင်တဲ့အနေနဲ့  အရင်က victory ဆိုတဲ့ အဓိပ္ပာယ် အတွက် သုံးခဲ့ကြတဲ့ လက်ဖဝါး အပြင်ဖက်မှာ ထားတဲ့ V sign ကိုပဲ peace/freedom စတဲ့ အဓိပ္ပာယ်တွေ အနေနဲ့  သုံးခဲ့ကြတယ် ။

အမေရိကန် နိုင်ငံ နဲ့  ကနေဒါ နိုင်ငံ တွေမှာ V sign လုပ်ပြတဲ့ အခါ လက်ဖဝါးကို အပြင်ဖက် မှာပဲ ထားထား ၊ အတွင်းဖက် မှာပဲ ထားထား victory သို့ မဟုတ် peace လို့ ပဲ အဓိပ္ပာယ် ရပေမဲ့ ၊ UK, Ireland, Australian, New Zealand, South African စတဲ့ နိုင်ငံတွေမှာတော့ လက်ဖဝါးကို အတွင်းဖက်ထားပြီး ပြတဲ့ V sign ဟာ ရိုင်းတဲ့ sign တစ်ခုဖြစ်တယ် ။

လက်ဖဝါးကို အတွင်းဖက်မှာထားတဲ့ V sign ဟာ ၁၄၁၅ ခုနှစ် အင်္ဂလန်နိုင်ငံ နဲ့  ပြင်သစ်နိုင်ငံ ကြား နာမည်ကျော် တိုက်ပွဲတစ်ခု ဖြစ်တဲ့ Battle of Agincourt က စခဲ့တာ ဖြစ်တယ် ။ အဲဒီ တိုက်ပွဲကာလမှာ ပြင်သစ်တွေဟာ ဒီတိုက်ပွဲကို နိုင်ပြီးခဲ့လျှင် အင်္ဂလိပ် မြှားပစ်သမားတွေ နောက်တစ်ခါ ထပ်ပြီးမြှား မပစ်နိုင်အောင် မြှားသမား အားလုံးရဲ့  လက်ခလယ်နဲ့  လက်ညှိုးကို ဖြတ်ပစ်မယ်လို့  ကြွေးကြော်ခဲ့တယ် ။ ဒါပေမဲ့ အဲဒီတိုက်ပွဲမှာ အင်္ဂလိပ်တွေ စစ်နိုင်ခဲ့တယ် ။ အင်္ဂလိပ် စစ်သားတွေဟာ လက်နှစ်ချောင်း ထောင်ပြပြီး ငါတို့  မှာ မြှားပစ်တဲ့ လက်ချောင်းတွေ ရှိသေးတယ်လို့ ပြင်သစ်တွေကို လှောင်ခဲ့ကြတယ် ။ အဲဒီ ရာဇဝင်ကြောင့် နိုင်ငံတော်တော် များများမှာ လက်ဖဝါးကို အတွင်းဖက်မှာထားတဲ့ V sign ကို အခြားသူကို စော်ကားတဲ့ sign ၊ ဆဲဆိုတဲ့ sign အနေနဲ့  ရိုင်းတဲ့ sign တစ်ခု အဖြစ် သတ်မှတ် ထားကြတယ် ။ ။